Gan ddarparu’r amgylchedd ddysgu gweledol gorau posib i bersonél, bydd ystyriaeth ofalus yn cael ei roi i olwg y Coleg Technegol trwy greu adeiladau hynod a thirlunio datblygiad gyda chymeriad.

Bydd y Coleg Technegol wedi ei lleoli o amgylch hen awyrendy DARA, gan sicrhau bod y cyfleuster hwn a adeiladwyd yn ddiweddar yn parhau i gael ei ddefnyddio’n briodol.

Bydd y myfyrwyr a fydd yn mynychu’r academi yn bobl broffesiynol ifanc a phrofiadol, yn ymroddedig i ddatblygu siliau mewn sawl disgyblaeth arbenigol. Golyga hyn y byddant wedi eu lleoli yn Sain Tathan yn hir dymor, a bydd llawer ohonynt yn dod i ystyried Sain Tathan yn gartref iddynt yn ystod y cyfnod hwn.

Mae De Cymru eisoes wedi sefydlu ei hun fel ardal o arbenigedd yn y diwydiant awyrofod trwy fusnesau sydd yma eisoes fel British Airways Avionics and Maintenance, a GE Aircraft Engine. Byddai’r Parc Busnes Awyrofod felly’n adeiladu ar y maes sgiliau hwn. Cynllun Llywodraeth Cynulliad Cymru ar gyfer y parc busnes yw cynnig yr adnoddau a’r seilwaith sydd ei angen ar gynhyrchwyr, cyflenwyr, darparwyr gwasanaeth a hyfforddwyr yn y sector awyrennau gyda phwyslais arbennig ar gynnal a chadw a thrwsio.

Byddai’r adnoddau hyn wedi eu lleoli i’r gorllewin o’r rhedfa groes, ar ochr ogleddol y brif redfa, ac i’r de o’r brif redfa. Bydd busnesau sy’n ymwneud a gwaith sifilaidd a milwrol mewn siediau awyrennau mawr fydd yn cynnwys cymysgedd o adeiladau newydd a siediau sy’n bodoli eisoes wedi eu hail ddatblygu.

Bydd y cynllun o safon uchel ac yn gweddu i’r amgylchfyd. Yn unol â’r Cod ar gyfer Cartrefi Cynaliadwy, strategaeth Llywodraeth y DG er mwyn annog safon genedlaethol newydd ar gyfer cynllunio ac adeiladu tai newydd yn gynaliadwy - bydd Metrix yn cynnwys y mesurau canlynol ble’n bosib:

Bydd cyfleusterau arfaethedig yn cynnwys caeau chwaraeon, cyrtiau tenis, trac rhedeg, meithrinfa, amgueddfa filwrol, eglwys rhyng-enwadol a phwll nofio. Bydd nifer o’r cyfleusterau hyn ar gael at ddefnydd y cyhoedd ar adegau penodol.

Er mwyn helpu i gwrdd ag anghenion ynni mewn modd cynaliadwy, bydd y datblygiad arfaethedig yn cynnwys Canolfan Ynni fydd yn cynnwys generadur biomas a fydd yn cael ei danio’n rhannol gan sglodion coed, gan leihau allyriadau carbon y Coleg Technegol o rhwng 30 a 60 y cant y flwyddyn. Yn ogystal â hyn, bydd cyfres o bolisïau amgylcheddol yn cael eu mabwysiadu, gydag un o’r cynlluniau ailgylchu a chompostio mwyaf cynhwysfawr mewn unrhyw ddatblygiad modern. Bydd system crynhoi dŵr yn cael ei gyflwyno ar y safle er mwyn rheoli dŵr ffo a bydd strategaeth lleihau gwastraff yn golygu y bydd rwbel o’r cyfnod chwalu yn cael ei ailddefnyddio fel defnydd adeiladu ac ar gyfer tirlunio’r safle.

Bydd cyfres gynhwysfawr o fesurau yn cael eu gweithredu er mwyn sicrhau’r effaith lleiaf ar fywyd gwyllt a bydd cynefinoedd newydd o’r safon uchaf yn cael eu darparu. Mae cyfres o byllau dŵr newydd eisoes wedi eu creu sy’n lloches ar gyfer bywyd gwyllt a chynefin delfrydol ar gyfer y boblogaeth o fadfallod dŵr cribog sydd yno eisoes.

Wrth ddarparu ail ddatblygiad arfaethedig Sain Tathan, bydd asesiad trafnidiaeth gynhwysfawr yn sicrhau bod ystyriaeth yn cael ei roi i sut y bydd y datblygiad yn effeithio ar y ffyrdd lleol a’r rhwydwaith trafnidiaeth sy’n bodoli eisoes.

Bydd gwaith gwella, yn cynnwys mynedfeydd newydd a gwelliannau i Ffordd Eglwys Brewis, Cyffordd Sain Tathan, ffordd y B4265 yn Gileston/Old Mill a chylchfan Waycock Cross yn helpu i sicrhau bod y rhwydwaith ffordd yn gallu ymdopi gyda chynnydd mewn traffig yn ystod cyfnodau prysur. Mae ceisiadau am gynllunio yn cynnwys cynigion ar gyfer mesurau ailosod a lliniaru ar gyfer traffig adeiladu sy’n cael ei greu gan y cynigion datblygu.

Bydd Cynllun Teithio Gwyrdd yn cael ei gyflwyno yn amlinellu mesurau i annog pobl sy’n cyrraedd a gadael y safle i ddefnyddio trafnidiaeth gyhoeddus neu rannu car. Rhagwelir y bydd y mwyafrif o’r personél ar y safle yn cerdded rhwng adeiladau a chyfleusterau. Bydd cerbydau’n aros yn bennaf ar berimedr y safle mewn meysydd parcio, felly bydd cerddwyr a beicwyr yn gallu cyrraedd y mannau craidd a’r “asgwrn cefn gwyrdd” yn ddiogel.

Bydd y brif fynedfa i’r Coleg Technegol Amddiffyn a’r Parc Busnes Awyrofod trwy ffordd a chyffordd newydd a fydd yn cael eu hadeiladu oddi ar y B4265. Bydd hyn yn sicrhau bod traffig i ac o’r safle yn cael mynediad uniongyrchol ac ar wahân i’r brif ffordd, gan ddarparu ffordd osgoi i’r anheddau agos Llanilltud Fawr a Sain Tathan felly ni fydd y rhai sy’n defnyddio’r ffyrdd eisoes yn cael eu heffeithio’n ormodol.

Bydd y ffordd hon hefyd yn gwella mynediad i Sain Tathan o draffordd yr M4. Fel sy’n ofynnol ym mhob safle milwrol, bydd allanfa argyfwng yn aros ar ochr ddwyreiniol y safle ble mae mynediad i East Camp eisoes yn bodoli.

Os caiff y cais am gynllunio ei gymeradwyo, ac yn dilyn cwblhau’r agweddau ariannol, gallai’r gwaith adeiladu ddechrau yn gynnar yn 2010 gyda chwblhad yr Academi Dechnegol erbyn 2014. Mae’r PBA yn brosiect tymor hir a fydd yn cael ei ddatblygu dros gyfnod o 5 i 20 mlynedd. Bydd yn cael ei adeiladu mewn tri cham er mwyn gwneud newidiadau graddol i adeiladau sy’n bodoli eisoes er mwyn eu troi yn ofod awyrendy newydd neu wedi ei uwchraddio.